Mundu guztiko ordezkaritzek eztabaidatu dute errausketaren etorkizuna Bartzelonan.

 Azaroaren 27, 28 eta 29an egin da Bartzelonan errausketaren aurkako eta zero zabor egitasmoaren aldeko II. Nazioarteko Topaketa eta bertan parte hartu du Olaztiko Portland-en zementu-fabrikan erraustearen aurkako 3MB (Hiru Mugak Batera) Plataformak. Hauexek izan ziren bertan eztabaidatutako gaiak laburki jasorik:

Estatuek hondakin errausketa zementu-fabriketara bideratzearen alde egiten dute.

Horrela, bide batez errausketa planta eraikitzeak duen kostuaren arazoa saihesteaz gain, herritarren erantzuna ere apaltzea lortzen dute, oro har herritarrek jarduera honen arriskuaz ohartu arren, nahi gabe ere urte luzez ezagutu duten zementu-fabrika baten ekoizpenarekin nahasten dutelako.

HEEa (Hondakinetatik Eratorritako Erregaia).

HEEak errausketazaleen laborategitik ateratako kontzeptu berri bezala definitu dira, lehenago “energia balorizazioa”-rekin eta beste kontzeptu batzuekin gertatu den bezalaxe. Orain horrela, hondakinekin prestatutako gai hori zementu labeetan, errauskailuetan, energia elektrikoa ekoizteko plantetan, … errausteko erregai bihurtzen dute. Gainera lotsagabeki herritarrak engainatu egiten dira (hondakinak hondakin izateari utzi eta erregai bihurtuz) eta aldi berean nazioartean edota erkidegoen artean hondakinak salerosteko mugak gainditu egiten dira.

Errausketa ez da konponbide. Zero zaborren aldeko apustua.

Ekoizten den material orok birziklagarria behar luke eta horrek materialak berreskuratzean oinarritutako ekonomia zirkularra indartuko luke alegia. Badira nazioartean zero zabor helburuak neurri handian lorgarriak direla egiaztatzen duten esperientzia ugari. Japonian, AEBetan, Mexikon, Italian, Eslovenian, Ugandan, … ingurumen hezkuntza programak, gaikako hondakin bilketa, gai ez-birziklagarrien berdiseinu industriala, e.a. ezartzen ari dira eta lortzen ari diren emaitzak ikusgarriak dira.

Horrekin batera hondakin errausketa zigortuko duen legeriaren alde egin behar da, jarduera horregatik gaixotzen direnen zainketa eta tratamenduek sortzen duten gastua arduradunen gain jarriko duena, hau da,kutsatzen duenak benetan ordain dezala egiten duen kaltea.

Bestalde Hondakin Prebentziorako Legea bultzatu behar da, ekoizlearen ardura sustatu, erabilera bakarreko produktuen ekoizpena debekatu (plastikozko poltsak, kafe kapsulak, …) eta ahalik eta hondakin gutxien sortzea helburu izango duena.

3MB Plataformak topaketa honetan eztabaidatutako guztia kontuan hartu beharko litzatekeela uste du, are gehiago, Nafarroako Hondakinen Kudeaketa Plan Integral berria egiten ari den garai honetan.